دنيا بلاكم اكيد ما تسوى ~

[بسمة الدنيا]

مسى الياسمين ~
ادري ولله اني مقصرة يا بيتي التاني ..
بس ايش اسوي ..؟؟!
جااا رمضان وانزحمنا كلنا معاه ..

اممم
صارت احداث كتيرة في الفترة اللي راحت ..
بس كلها عادية يعني مافي شيء مررة مهم


يوم الاربعاء اللي فات كنا معزومين فطور في بيت عمي .. اجتمعنا كلنا انا وسلفاتي واخوات زوجي ورجالهم .. هادا هو الشي الحلو في رمضان اللمة وصلة الارحام

يوم الخميس رحنا السوق اشتريت لنفسي قطعتين للعيد واشتريت لفوفو فساتين ,,
اما لوفة وسعودي ما اشتريتلهم
اتفقنا انا وابو سعود نشتريلهم على نص الشهر .. تكون نزلت رواتب الموظفين .. ويكون استلم راتبه
بصراحة الدنيا مولعة .. كل شيء غالي حتى ملابس الصغار ناار ..
وعاد نحن ناس عندنا انفلونزا الماركات .. إذا اللبس مو ماركة ما يعجبنا ..
وبعدين نشتكي من الغلى ,,!
ياللا ربي يعين .. اهم شيء العافية ونشوف عيالنا طيبين وفرحانين مو ناقصهم شي..
وإذا على الفلوس تروح وتجي .. كدا ولا كدا ما تقعد..


بكرى الفطور عند ماما .. يا قلبي عليها ..
رحت لها البارح .. ولقيتها يا قلبو حايسة بتجهز لفطور بكرى ..
طبعاً لازم اساعدها .. اتنفقنا انا وهي كل وحدة مننا ايش تطبخ ..ووزعنا على كل وحدة شيء ..طبعاً انا واخواتي وحريم اخواني ..

افكر بعد ما نطلع من بيت ماما نمر السوق ..القي نظرة يمكن اشوف شيء يعجبني ..

[بسمة الدنيا]

حبكَ واهتمامكَ وحنانكَ وطيب قلبكَ وأصلكَ
كلهم على راسي ..
وادري اني مقدر أجازيكَ
أنا لو قلت : أحبك
ترى بالحيييل أجحفتكَ ..!

[بسمة الدنيا]

مسى الجوري ~
ولله وعرفوا كيف يلهوا الناس ويشغلوهم ..
اللي صاير في العالم شيء مو طبيعي ..!
اللين الواحد صار ما يبغى يروح لأحد ..
تخيلوا قبل كم يوم رحنا بيت عمي .. على اساس نزورهم - وندق الباب وندق وماحد فتح لنا ..
رجعنا البيت .. وزوجي اتصل فيهم : عسى خير فينكم .جيناكم البيت ومحد يفتح انتم برى ..!
والا عمي يعتذر لا ولله معليش عشان المسلسل ترى ما سمعنا الباب ..
ولله شيء يرفع الضغط ..
ولا.... مسوين احزاب كل مجموعة على تلفزيون ويتابعوا شيء ..

دحين انا في بيت ماما .. من اول قاعدة لحالي محد معبرني كلهم قدام التلفزيون ..ومن مسلسل لمسلسل وياقلبي لا تحزن .."
المشكلة حتى البزورة الصغار محشورين مع الكبار وبيتفرجوا ..ومتابعين
حتى ولد اختي عمره 4 سنوات ونص متابع باب الحارة ..! وشافني على الاب وينادني خالهـ تعالي شوفي باب الحارة تراها بدأت ...
من جد حالة .. قلت مادام الحال كدا ..ياليت قعدت في بيتي ابرك ..

[بسمة الدنيا]

عساني ما انحرم منك
فديتك
كل يوم تبهرني بأسلوبك وفن حبك والوان اهتمامك
حسستني ..
ان حبنا في كل عمره شباب ..
وانه ربيع في كل الفصول ..

[بسمة الدنيا]

اليوم وانا في الدوام
حبيبي مسوي لي مفاجئة
بصراحة دائما يبهرني بمفاجئاته اللي ما اتوقعها ..
انهال علي بوابل من المسجات الحلوة
وربي جات في وقتها وكأنه حاس فيني ..
فديته

[بسمة الدنيا]

مسى الفل ,,
كيفكم ...؟
اليومين اللي راحوا مرة ما فضيت بصراحة ..
ادري اني مقصرة على المنتى والمدونة وكل شيء .. ربي يفرجها من عنده

البارح جاتني هجورة .. هي وامها .. يا قلبي عليها كبرت وسارت تجنن ربي يحميها ,,
وعجبها الحال عندي ما تبغى تروح قطعت قلبي وربي .. بس تبكي ما تبغى ترجع مع امها ..
انبسطت مع لوفة وسعود ..
قلت لسلفتي تخليها عندنا كم يوم ..قالت عندها مراجعة في المستشفى ما يقدروا يأخروا الموعد..

واول البارح ما كانا في البيت .. رحنا الردسي ومن هناك رحنا على البحر اتسحرنا هناك

وبكرى السحور عندي .. عازمة اهل بابا .. عماتي وبناتهم ..
طبعاً عزمت ماما واخواتي وحماتي وبناتها وسلفاتي ...

طبعاً بدأت التجهيزات من اليوم ..
دحين شويا نبغى أنا وابو سعود نروح نقضي .. اشوى البزورة ناموا ..عشان نقضي برواقة اصلاً هي خلقة الدنيا زحمة وتخيلوا تاخذوا معاكم بزورة .."
بخليهم ومعاهم نونا أخت زوجي الصغيرة صار لها اسبوع عندنا ..
طفشانة في بيتهم وحابة تغير جو .. بس عسولة اسم الله عليها